Ref: 2024/PR/380
ޔޫރަޕިއަން ޔޫނިއަންގެ ހައި ރެޕްރެޒެންޓެޓިވް ފޮރ ފޮރިން އެފެއާޒް އަދި ސެކުއިރިޓީ ޕޮލިސީ އަދި ޔޫރަޕިއަން ކޮމިޝަންގެ ނައިބު ރައީސާ ކަމުގެ މަޤާމަށް އައްޔަނުކުރެވިފައިވާ ކާޔާ ކަލަސް އަށް ދިވެހިރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް ތަހުނިޔާގެ މެސެޖެއް ފޮނުއްވައިފިއެވެ.
މިނިސްޓަރުގެ މެސެޖު ތިރީގައި މިވަނީއެވެ.
"ޔޫރަޕިއަން ޔޫނިއަންގެ އައު ހައި ރެޕްރެޒެންޓެޓިވް ފޮރ ފޮރިން އެފެއާޒް އެންޑް ސެކިއުރިޓީ ޕޮލިސީ އަދި ޔޫރަޕިއަން ކޮމިޝަންގެ ނައިބު ރައީސާގެ މަޤާމަށް ކަމަނާ އައްޔަނު ކުރެއްވުމާ ގުޅިގެން ތަހުނިޔާ އަރިސްކުރަމެވެ.
ދިވެހިރާއްޖެއާއި ޔޫރަޕިއަން ޔޫނިއަނާ ދެމެދު އޮތް ގުޅުމަށް އައިސްފައިވާ ބޮޑެތި ކުރިއެރުންތައް ލިބިފައިވާކަމަށާއި މި އަހަރުގެ ތެރޭގައި ދެފަރާތުގެ ދެމެދުގައި ފުރަތަމަ ފަހަރަށް ޕާޓްނަރޝިޕް އެއްބަސްވުމެއްގައި ސޮއިކުރެވުނުކަން ފާހަގަކުރަމެވެ. އަދި މި އެއްބަސްވުމުގެ ދަށުން އިޤްތިޞާދީ ތަރައްޤީ އާއި ވިޔަފާރީގެ ދާއިރާ އާއި ތިމާވެއްޓާ މޫސުމަށް އަންނަ ބަދަލުތައް ފަދަ ގިނަ ދާއިރާތަކުން އަޅުގަނޑުމެންގެ ގުޅުން އިތުރަށް ބަދަހިވެގެންދާނެކަންވެސް ފާހަގަކުރަމެވެ. ވަކިން ޚާއްޞަކޮށް، ދިވެހިރާއްޖޭގެ ދެމެހެއްޓެނިވި މަސްވެރިކަމުގެ ޞިނާޢަތާއި، ދިވެހިރާއްޖެއިން ޔޫރަޕިއަން ޔޫނިއަނަށް އެކްސްޕޯޓްކުރާ ކަނޑުމަހަށް ޑިއުޓީ ފްރީ އެކްސެސް ހޯދުމުގައިވެސް މިކަމުގެ ސަބަބުން އެހީތެރިކަން ލިބިގެންދާނެކަމަށް އަޅުގަނޑު އުއްމީދުކުރަމެވެ.
އިސްވެދެންނެވުނު ކަންކަމުގައި ކަމަނާއާ ގުޅިގެން މަސައްކަތް ކުރުމަށް އަޅުގަނޑު ދެމިހުންނާނެކަމުގެ ޔަޤީންކަން އަރުވަމެވެ. އަދި ކުރިއަށް އޮތް އަހަރުތަކުގައިވެސް ރާއްޖެއާއި ޔޫރަޕިއަން ޔޫނިއަނާ ދެމެދު އޮތް އެކުވެރިކަމާއި އެއްބާރުލުމުގެ ގުޅުން އިތުރަށް ބަދަހިވެގެންދާނެކަމަށް އަޅުގަނޑު އުއްމީދުކުރަމެވެ.
ކަމަނާއަށް ދުޅަހެޔޮ ޞިއްޙަތާއި ޔޫރަޕިއަން ޔޫނިއަނަށް އިތުރު ކުރިއެރުމަށް އިޚްލާސްތެރިކަމާއެކު އެދެމެވެ. އަޅުގަނޑު ކަމަނާއަށް ކުރާ ޤަދަރު އާކޮށް، އެކަން ޔަޤީންކޮށް އެރުވުމަށް، މި ފުރުސަތުގެ ބޭނުންކުރީމެވެ."
ނިމުނީ.