Ref: 2024/PR/321
ޖަޕާންގެ އައު ޚާރިޖީ ވަޒީރުގެ މަޤާމަށް އައްޔަނުކުރެވިފައިވާ ތަކެޝި އިވަޔާ އަށް ދިވެހިރާއްޖޭގެ ޚާރިޖީ ވަޒީރު ޑޮކްޓަރ ޢަބްދުﷲ ޚަލީލް ތަހުނިޔާގެ މެސެޖެއް ފޮނުއްވައިފި.
މިނިސްޓަރުގެ މެސެޖު ތިރީގައި މިވަނީއެވެ.
ޖަޕާނުގެ މިނިސްޓަރ އޮފް ފޮރިން އެފެއާޒްގެ މަގާމަށް މަނިކުފާނު އައްޔަނު ކުރެއްވުމާ ގުޅިގެން ތަހުނިޔާ އަރިސްކުރުމަކީ އަޅުގަނޑަށް ލިބޭ އުފަލެކެވެ. ޝައްކެއްވެސްނެތް ގޮތުގައި މަނިކުފާނުގެ ނަމޫނާ ލީޑަރޝިޕާއި ތަޖުރިބާގެ އަލީގައި މަނިކުފާނުގެ ދައުރުގައި ބޮޑެތި ކާމިޔާބީތަކެއް ލިބިގެންދާނެއެވެ.
ދިވެހިރާއްޖެއާއި ޖަޕާނާ ދެމެދު ސިޔާސީ ގުޅުން ޤާއިމުކުރެވުނުތާ 56 އަހަރުގެ ތެރޭގައި، ޒަމާނުއްސުރެ އުފެދިފައިވާ މިގާތް ގުޅުމަކީ، ދެޤައުމުގެ މެދުގައި އޮންނަ އިތުބާރާއި އިޙްތިރާމުގެ މައްޗަށް ބިނާވެފައިވާ ގުޅުމެކެވެ. ޖަޕާނަކީ ދިވެހިރާއްޖޭގެ ތަރައްގީއަށް ތަފާތުގިނަ ދާއިރާތަކަކުން އަގުނުކުރެވޭ އެހީތެރިކަން ފޯރުކޮށްދެއްވާފައިވާ ޤައުމެެކެވެ. ދެޤައުމުގެ މެދުގައްޔާއި ދެޤައުމުގެ ރައްޔިތުންގެ މެދުގައި ޒަމާނުއްސުރެ އުފެދިފައިވާ މިގާތް ގުޅުމުގެ ސަބަބުން، ދެމެހެއްޓެނިވި އިޤްތިޞާދީ ތަނަވަސްކަން ކުރިއެރުމާއި، ރައްޔިތުންގެ ދުޅަހެޔޮކަން އިތުރުކުރުމަށް މަގުފަހިވެގެންދިޔައެވެ.
ބައިނަލްއަޤްވާމީ ގޮތުން ކުރިމަތިވެފައިވާ ގޮންޖެހުންތަކާ ކުރިމަތިލާއިރު، މަނިކުފާނުގެ ލީޑަރޝިޕްގެ ދަށުން، ދިވެހިރާއްޖެއާއި ޖަޕާނާ ދެޤައުމުގެ ގުޅުން އިތުރަށް ހަރުދަނާވެ، އައު ދާއިރާތަކުން އެއްބާރުލުން ހޯދޭނެކަމާމެދު އަޅުގަނޑަށް ޔަޤީންކަން އެބައޮތެވެ. އަދި 'ފްރީ އެންޑް އޯޕަން އިންޑޯ-ޕެސިފިކް' ސަރަހައްދެއް ކުރިއެރުވުމަށް ޖަޕާނުން ކުރަމުންދާ މަސައްކަތަށް ރާއްޖެއިން އަބަދުވެސް އެއްބާރުލުން ދޭނެކަމުގެ ޔަގީންކަން އަރުވަމެވެ.
މަނިކުފާނުގެ ލީޑަރޝިޕްގެ ދަށުން އަޅުގަނޑުމެންގެ ދެ ޤައުމުގެ ގުޅުން އިތުރަށް ވަރުގަދަވެ، އައު އުސްމިންތަކަކަށް ވާޞިލުވެގެންދާނެކަމުގެ ޔަޤީންކަން އަރުވައި، މަނިކުފާނުގެ ދައުރުގައި ގިނަ ކާމިޔަބީތަކަށް އެދެމެވެ.