Ref: 2026/PR/12
އިންޑިއާގެ ޖުމްހޫރީ ދުވަހުގެ މުނާސަބަތުގައި އެޤައުމުގެ އެކްސްޓަރނަލް އެފެއާޒް މިނިސްޓަރ ޑޮކްޓަރ ސުބްރަމާނިއަމް ޖައިޝަންކަރު އަށް ދިވެހިރާއްޖޭގެ ޚާރިޖީ ވަޒީރު، ޑޮކްޓަރ ޢަބްދުﷲ ޚަލީލް ތަހުނިޔާގެ މެސެޖެއް ފޮނުއްވައިފިއެވެ.
ވަޒީރުގެ މެސެޖު ތިރީގައި މިވަނީއެވެ.
އިންޑިއާގެ 77 ވަނަ ޖުމްހޫރީ ދުވަހުގެ އުފާވެރި މުނާސަބަތުގައި، ދިވެހި ސަރުކާރާއި ރައްޔިތުންގެ ނަމުގަޔާއި، އަދި އަޅުގަނޑުގެ އަމިއްލަ ނަމުގައި، މަނިކުފާނަށާއި، އިންޑިއާގެ ސަރުކާރަށް އަދި އިންޑިއާގެ އެކުވެރި ރައްޔިތުންނަށް ހޫނު މަރުޙަބާއެއް ދަންނަވައި، ހެޔޮއެދުންތައް އަރިސްކުރުމަކީ އަޅުގަނޑަށް ލިބޭ ނުހަނު ބޮޑު އުފަލެކެވެ.
އިންޑިއާގެ ޖުމްހޫރީ ދުވަސް ފާހަގަކުރުމުން ރަމްޒުކޮށްދެނީ، ޑިމޮކްރެޓިކް ހަމަތައް ނެގެހެއްޓުމަށާއި، އެންމެން ޝާމިލުވާ ގޮތަށް ޤައުމު ތަރައްޤީކުރުމަށް އިންޑިއާއިން ދެމުންގެންދާ އަހަންމިއްޔަތުކަމެވެ. ދުނިޔޭގެ އެންމެ ބޮޑު ޑިމޮކްރަސީގެ ގޮތުގަޔާއި، ޒަމާންވީ ޙަޟާރަތެއް އޮތް ޤައުމެއްގެ ގޮތުން، މި ސަރަޙައްދުގެ ޞުލްޙަޔާއި ހަމަޖެހުން ޤާއިމުކޮށް، ގުޅުން ބަދަހިކުރުމުގައި އިންޑިއާއިން އަދާކުރަމުންދަނީ މުހިންމު ދައުރެކެވެ.
ދިވެހިރާއްޖެއާއި އިންޑިއާއާ ދެމެދު އޮތް ޒަމާންވީ ގާތް ގުޅުން އިތުރަށް ބަދަހިވެ، ދެޤައުމުގެ ދޭދޭ ގުޅުންތަކަށް ލިބިފައިވާ ކުރިއެރުންތައް، މި ފުރުޞަތުގައި އަޅުގަނޑު ފާހަގަކުރަމެވެ. މިއިން ދައްކުވައިދެނީ ދެޤައުމުގެ ދެމެދުގައި އޮތް އިތުބާރާއި، އެއްބަޔަކު އަނެއް ބަޔަކަށް އިޙްތިރާމްކުރުމާއި، ދެޤައުމުގެ ގުޅުން ބިނާވެފައިވާ މައިގަނޑު އަސާސްތަކުގެ ވަރުގަދަކަމެވެ.
މަނިކުފާނަށް ދުޅަހެޔޮ ޞިއްޙަތާއި އުފާފާގަތިކަމަށް އެދި، އަދި އިންޑިއާގެ ރައްޔިތުންނަށް އިތުރު ކުރިއެރުމާއި ތަރައްޤީއަށް އެދި، އަޅުގަނޑުގެ އިޚްލާޞްތެރި ހެޔޮއެދުންތައް މި ފުރުޞަތުގައި އަރިސްކުރަމެވެ.
އަޅުގަނޑު މަނިކުފާނަށް ކުރާ މަތިވެރި ޤަދަރާއި އިޙްތިރާމް ޤަބޫލުފުޅުކުރެއްވުން އެދެމެވެ.
ނިމުނީ