ޚަބަރު

އިންޑިއާ ސަފީރު، ޚާރިޖީ ވަޒީރު ގެ އަރިހަށް ވަދާޢީ ޒިޔާރަތެއް ކުރައްވައިފި

Ref: 2024/PR/370

އިންޑިއާ އިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު، މަނޫ މަހާވަރު، ޚާރިޖީ ވަޒީރު ޑރ. ޢަބްދުﷲ ޚަލީލު ގެ އަރިހަށް މިއަދު ހެނދުނު ވަދާޢީ ޒިޔާރަތެއް ކުރައްވައިފިއެވެ. ފޮރިން މިނިސްޓްރީގައި ބޭއްވި މި ބައްދަލުވުމުގައި ދިވެހިރާއްޖެ އާއި އިންޑިއާގެ ގުޅުން ހަރުދަނާ ކުރުމަށްޓަކައި، ޚާއްޞަކޮށް ވޭތުވެދިޔަ އަހަރެއްހާ ދުވަހުގެ ތެރޭގައި، ސަފީރުގެ މުހިންމު ޙިއްޞާތައް ވަނީ ފާހަގަކޮށްފައެވެ.

މިއަދު ހެނދުނު ފޮރިން މިނިސްޓްރީގައި ބޭއްވި މި ބައްދަލުވުމުގައި ފޮރިން މިނިސްޓަރު ޚަލީލް ވަނީ ދެޤައުމުގެ ގުޅުން ބަދަހިކުރުމަށް، ދެޤައުމުގެ ދޭދޭ ފަރުދުން މެދުގައި އާއި ވިޔަފާރީގެ ގުޅުން ބަދަހިކުރުމާއި، ދެގައުމުގެ މެދު މުއާމަލާތްތަކަށް މަގުފަހިކޮށްދިނުމުގައި ހައިކޮމިޝަނަރު އަދާކުރެއްވި މުހިންމު ދައުރަށް ތައުރީފު ކުރައްވާފައެވެ. އަދި ރާއްޖޭގެ އުމްރާނީ ތަރައްގީގެ ބިޔަ މަޝްރޫއުތައް އަދި މުހިންމު ރަށްރަށުގެ ފަރުދީ ތަރައްޤީއަށް - ކޮމިއުނިޓީ ޑިވެލޮޕްމަންޓް މަޝްރޫއުތައް ކުރިއެރުމަށްޓަކައި އިންޑިއާ ސަރުކާރުން ދެއްވާ އެހީތެރިކަށް ފާހަގަކުރައްވާފަ އެވެ. އަދި ރޫޕޭ ކާޑު އޮޕަރޭޝަނަލައިޒް ކުރުމާއި، ޔޫޕީއައި ތައާރަފް ކުރުމާއި، ލޯކަލް ކަރަންސީ ޓްރޭޑް އެގްރީމަންޓްތައް ފަދަ މައިލްސްޓޯންތަކަކީ އިގްތިސާދަށް އެޅުނު ހަރުދަނާ ފިޔަވަޅެއްކަމުގައި ފާހަގަކުރަށްވާފައެވެ.

އިންޑިއާ ސަފީރު މަނޫ މަހާވަރު ވަނީ އެމަނިކުފާނުގެ މަސައްކަތުގައި ދިވެހި ސަރުކާރާއި، ރައްޔިތުން ދެއްވި ފުރިހަމަ އެއްބާރުލުމާއި ބެހެއްޓެވި ގާތްކަމަށް އިޚްލާޞްތެރިކަމާއެކު ޝުކުރު އަދާކުރައްވާފައެވެ. އިންޑިއާ އާއި ދިވެހިރާއްޖޭގެ ގުޅުން ކުރިއަށް އޮތްތަނުގައި ކުރިއަރައި ތަނަވަސްކަންމަތީ ދެމިއޮތުމަށް އުންމީދު ކުރައްވައި، އެ މަނިކުފާނު ރާއްޖޭގެ ދެމިހުންނަނިވި އެކުވެރިއެއް ކަމުގައި ދެމިހުންނާނެ ކަމުގައި ވިދާޅުވެފައެވެ. 

މި ބައްދަލުވުމުގައި ޚާރިޖީ ވަޒީރު ޑރ. ޚަލީލާއި އިންޑިއާ ސަފީރު މަނޫ މަހާވަރު ވަނީ ފާއިތުވެދިޔަ އަހަރުގެ ފާހަގަކޮށްލެވޭ ކާމިޔާބީތަކަށް އަލިއަޅުވާލައްވައި، ރައީސުލްޖުމްހޫރިއްޔާގެ ކާމިޔާބު ފުރަމާނަ ދަތުރުފުޅުގައި އެއްބަސްވެވުނު ކަންކަމާ މެދު މަޝްވަރާކުރައްވާފައެވެ. 

އިންޑިއާ ސަފީރު މަސައްކަތްޕުޅު ނިންމާލައްވަނީ ތިން އަހަރަށްވުރެ ގިނަ މުއްދަތަކަށް ދެ ޤައުމުގެ ގުޅުން ބަދަހިކުރުމަށް ޚިދުމަތް ކުރެއްވުމަށްފަހުގައެވެ. މި ބައްދަލުވުން ނިންމަވާލައްވަމުން، ސަފީރަށް ކުރިއެރުމާއި ކާމިޔާބީ އަށް އެދިވަޑައިގެން، އަދި ދިވެހިރާއްޖޭގެ ގާތް އެކުވެރި ބައިވެރިންގެ ގޮތުގައި ދެމިހުންނަވާނެ ކަމަށް އުންމީދު ކުރައްވާ ކަމަށް ވެސް ވިދާޅުވި އެވެ.

 

މިނިސްޓްރީ އޮފް ފޮރިން އެފެއާޒް,މާލެ، ދިވެހިރާއްޖެ،20077 |ފޯން ނަންބަރު: 3323400-00960 | ހޮޓްލައިން: 7983400-00960