2017 އޭޕްރީލް 3
ރާއްޖެއިން ބޭރުގައި ދިވެހިންނަށް ދިމާވާ އެކިއެކި ކަންކަމުގައި ބޭނުންވާ ކޮންސިއުލަރ ޚިދްމަތްތައް ފޯރުކޮށްދިނުމަކީ މި މިނިސްޓްރީން ޚާއްސަ ސަމާލުކަމެއް ދީގެން ކުރިއަށްގެންދާ މަސައްކަތެކެވެ. މިގޮތުން، ރާއްޖެއިން ބޭރުގައި ތިބި ދިވެހި ކިޔަވާ ކުދިންނަށާއި، ރާއްޖެއ ބޭރުގައި ދިރިއުޅޭ ދިވެހި ޢާއިލާތަކަށާއި އަދި ރާއްޖެއިން ބޭރަށް ދަތުރުކުރާ ދިވެހި ރައްޔިތުންނަށް އެހީތެރިކަން ބޭނުންވާ ޙާލަތްތަކުގައި، ކަނޑައެޅިފައިވާ އުޞޫލުތަކާ އެއްގޮތްވާ ގޮތުގެމަތިން މިމިނިސްޓްރީއާއި ބޭރުގައި ހުންނަ ދިވެހިރާއްޖޭގެ މިޝަންތަކުން ގެންދަނީ ކޮންސިއުލަރ ޚިދްމަތްތައް ފޯރުކޮށްދެމުންނެވެ.
އިންޑިޔާ އާއި ބަންގްލަދޭޝްގައި ދިވެހި ދެ ޢާއިލާއަށް ދާދިފަހުން ކުރިމަތިވި ކަންތައްތަކުގައި ވެސް މިނިސްޓްރީގެ އެހީތެރިކަމާއި އެއްބާރުލުން ފުރިހަމައަށް ދީފައި ވާނޭކަމުގައި ދަންނަވަމެވެ. އެގޮތުން ދިވެހި ރައްޔިތަކާއި އިންޑިޔާގެ ރައްޔިތެއް ކައިވެނިކޮށްގެން ލިބިފައިވާ ކުދިންނާ ގުޅޭގޮތުން އުފެދިފައިވާ މައްސަލައަށް ޙައްލެއް ހޯދުމަށް ޓްރިވެންޑްރަމްގައި ހުންނަ ދިވެހި ކޮންސުލޭޓުންވަނީ ގިނަ މަސައްކަތްތަކެއް ކޮށްފައެވެ. ހަމައެއާއެކު، ބަންގްލަދޭޝްގައި ނިޔާވި ދިވެހި ދަރިވަރުގެ ޢާއިލާއިން، އެހީތެރިކަމަށް އެދުނު ހުރިހާކަމެއްގައި ވެސް މިނިސްޓްރީ އާއި ބަންގްލަދޭޝްގައި ހުންނަ ދިވެހިރާއްޖޭގެ އެމްބަސީގެ ފަރާތުން ވާނީ ފުރިހަމަ އެހީތެރިކަމާއި އެއްބާރުލުންދީފައެވެ.
ދިވެހި ރައްޔިތުންނަށް ދިމާވާ ކޮންސިއުލަރ މައްސަލަތަކުގައި ކުރިއަށްއޮތްތާނގައިވެސް މިނިސްޓްރީ އާއި ދިވެހި އެމްބަސީތަކުން ފުރިހަމަ އެހީތެރިކަން ލިބޭނެކަމުގެ ޔަޤީންކަން އަރުވަމެވެ.
-------------------------